Dagiti protesta

#AcademicBreakNow idiay Baguio. Inpatungpal ti uppat nga unibersidad iti Baguio City ti panawagan dagiti estudyante para iti apagbiit a bakasyon manipud kadagiti asignatura da wenno academic break. Segun kadagiti estudyante nairut ti pagkasapulan tapno makainana da iti kinaadu ken kinadagsen dagiti rekisito iti pagadalan. Nagalimpatok ti protesta iti panagtataripnong ti 400 nga agad-adal ken manursuro ti Saint Louis University idi Nobyembre 1. Naikeddeng ti academic break manipud Nobyembre 2 agingga 8.

Tagapagsarita ni Duterte, inaribungbongan idiay US. Inaribungbungan dagiti kliyente ti maysa a restoran ken dagiti aktibista iti US ni Harry Roque, tagapagsarita ni Rodrigo Duterte, idi Oktubre 30. Adda idiay New York, US idi ni Roque tapno ipilit ti bagbagi na nga agbalin a myembro ti International Law Commission, ti pormasyon nga agibotbotos kadagiti abugado iti International Criminal Court. Inawagan isuna dagiti aktibista a “kriminal iti gubat” ken “nabarayuboy.”

Panaglaban kontra pribatisasyon iti Cebu. Nagprotesta iti sango ti city hall idi Oktubre 27 ti People’s Coalition Against Privatization-Cebu tapno tubngaren ti umadani a pribatisasyon ti Metropolitan Cebu Water District. Iyaw-awag ti koalisyon ti panangsalaknib iti karbengan ti umili iti danum, sanitasyon ken dadduma pay a serbisyo iti gimong.

Mangmangged iti salun-at iti Maynila.  Nagrali dagiti mangmangged iti salun-at ti Tondo Medical Center (TMC) idi Oktubre 27 tapno irupir a maited ti natantan a benepisyo da. Nasurok 10 a mangmangged iti salun-at ti nagresaynen iti ospital gapu iti kinaawan ti proteksyon, sobra a trabaho ken nababa a sweldo. Awan ti nayon a badyet ti ospital iti laksid ti agtultuloy a panagadu dagiti pasyente ditoy.