Saan a marisut ti dagiti pinutar ti militar a “pederasyon dagiti people’s organization (timpuyog dagiti umili)” ti nabayagen a parikut dagiti mannalon ken Lumad. Daytoy ti sungbat ti Pambansang Katipunan ng mga Magbubukid-Southern Mindanao Region (PKM-SMR) iti naipadamag idi maikatlo a lawas ti Oktubre a nangbukel ti 10th ID kadagiti “pederasyon dagiti timpuyog ti masa” iti rehiyon.
Segun iti tagapagsarita ti PKM-SMR a ni Restituto Baguer, saan a risrisuten dagiti organisasyon a binukel ti militar ti kinaawan ti daga ken dadduma pay a langa ti panaggundaway kadagiti mannalon ken Lumad. Kinapudnona, kunana, “pinakaro dagitoy ti patakaran ti gubyerno a Duterte pabor iti panagsukat-usar ti daga para iti kapitalista a plantasyon a monocropa (panagmula ti maysa laeng a tipo ti mula), nalawa nga operasyon iti panagminas, agroturismo ken dagiti proyekto nga impraistruktura.”
Tinudo ni Baguer ti saan a bumaba iti 18 a munisipalidad ken syudad iti rehiyon nu sadinno a rinibo a pamilya a mannalon ti mapadpadisi tapno wayaan ti panagpalawa dagiti plantasyon. Kadagitoy a lugar, dagiti binukel ti militar nga organisasyon ket agserserbi nga instrumento tapno mapapardas ti panag-agaw kadagiti kapagayan, kamaisan, kanatengan ken dadduma pay a pagmulaan.
Dinakamat ni Baguer dagiti sigud a timpuyog dagiti mannalon ken unyon dagiti mangmangged iti Maragusan, Davao de Oro a naawanan ti bileg kalpasan a mapilit da nga agsurender kas kamkameng ti Bagong Hukbong Bayan (BHB). Gapu ditoy ket nawayaan dagiti kapitalista a plantasyon nga agawen ti daga iti linged dagiti mangirurumen nga agricultural ventures agreement. Segun pay ken Baguer, ad-adda a pabor kadagiti kumpanya a mangtagikua laengen kadagiti kataltalonan ngem ti gumastos iti rehabilitasyon ti daga a pinerdi ti deka-dekadan a monocropa a panagmula dagiti plantasyon.
Adda met ti saan a bumaba iti 37,000 nga ektarya nga aprubadon a serken dagiti kumpanya ti panagminas. Malaksid ditoy ket adda maysa a milyon nga ektarya pay ti naipasidongen kadagiti aplikasyon iti panagminas manipud 2017. “Naigarantiyan kadagiti kumpanya iti panagminas ken agroturismo ti ili ti Talaingod ken ti Kabanbantayan ti Pantaron, isu nga awan-sarday ti gera ti Armed Forces of the Philippines (AFP) laban kadagiti Lumad iti lugar,” kuna ni Baguer. “Nagbalin a para-aprubar laeng dagiti binukel ti AFP nga organisasyon para iti panagserrek dagitoy a makadadael a proyekto,” nayon na.
Inlawag ti PKM nga awan ti programa dagitoy nga organisasyon tapno dupraken ti bileg dagiti apo’t daga, iti libre a panagibunong ti daga, wenno panangited ti kumprehensibo nga ayuda para iti panangpadur-as ti produksyon. “Awan ti kampanya tapno pangatuen ti presyo dagiti produkto mi, ken maibaba dagiti babayadan iti panagbilag ken panagpagiling kadagiti ani. Awan ti panangiparit iti usura,” salaysay pay ni Baguer.
Kamaudian, inbunannag ni Baguer a dagiti nasao nga organisasyon ken dagiti aktibidad da nga indauluan ti 10th ID ket agserserbi laeng nga arkos tapno paglangaen nga agbalballigi ti kampanya da iti kontra-insurhensya. “Nakarkaro pay, dagitoy ket ar-aramiden a pagbagasan ti militar,” innayon na.
Idiay Southern Leyte ket nangidaulo met ti 8th ID ti panangbukel ti “pederasyon” iti kapada a panggep.
Saanen a baro ti panagbukel ti AFP kadagiti organisasyon a pangbatog kano kadagiti organisasyon masa kadagiti baryo ken komunidad. Iti sidong ti Oplan Bayanihan ti rehimen US-Aquino III, dagiti “peace and development team” a nang-okupa kadagiti komunidad ket inkapilitan a nangbukel kadagiti “counter organization” dagiti mannalon, kabataan ken kababaihan. Amin dagitoy ket napaay a dadaelen ti panagkaykaysa dagiti residente iti baryo. Agtaltalinaed a nakatakder ti PKM kadagiti baryo.
Ti PKM ti rebolusyonaryo nga organisasyon dagiti mannalon a nairut a kabinnadang ti BHB iti panangitandudo iti rebolusyon agraryo.
PRWC Newsroom » Ang Bayan 