Ihunong ang teroristang pagpamomba gikan sa kahanginan!

Ang pagpanghulog og mga bomba gikan sa kahanginan sa mga helikopter ug eroplanong iggugubat, lakip ang paggamit sa mga drone alang sa sarbeylans sa ginalunsad nga gyera kontra-gerilya, lapas sa internasyunal nga makitawhanong balaod nga nagagiya sa kondukta sa gyera. Kinahangalang ihunong ug ibawal ang paggamit sa maong mga armas.

Sobra kaayo ang ginahulog nga tone-toneladang bomba, ginapalupad nga rocket, ginabugang mga bala sa masinggan, ug pagpanganyon sa militar. Ang maong kusog nga armas nga kasagarang ginagamit pangguba sa mga tangke ug bilding, nagabunga og grabeng kadaut sa kinabuhi ug kinaiyahan. Labing bangis ang paggamit sa Armed Forces of the Philippines (AFP) og “proximity fuse” aron pabusikaron ang bomba pipila ka metro ayha kini mobugsok sa yuta nga nagbunga og mas grabe pang kadaut.

Gipalambo sa AFP ang katakus niini sa pagpunting sa pagabombahang target gamit ang mga drone alang sa pagpaniktik gikan sa kahanginan (pagkuha og litrato, thermal imaging ug elektronikong pagpaniktik) sa halapad nga kayutaan. Nakasumpay kini sa lokal nga mga espiya ug mga kahimanang paniktik aron puntingon ang mga pwesto sa Bagong Hukbong Bayan (BHB).

Aduna nay pipila ka higayon nga miigo ang mga bomba sa mga pwesto o kampo sa BHB nga hinungdan sa pagkamatay sa daghang ihap sa Pulang mangugubat, sama sa pagkakalas sa 20 sa Dolores, Eastern Samar niadtong Agosto 16, 10 sa Gingoog City sa Misamis Oriental niadtong Mayo 10, 2020, ug pito sa Sta. Teresita, Cagayan Valley niining Setyembre 21. Sagad nga ginahimo ang pagpamomba sa mga napunting nga pwesto sa BHB sa kaadlawon.

Ang paggamit sa hilabihan ka kusog nga armas sukwahi sa mga prinsipyo sa makitawhanong balaod nga nagkanayon nga ang paggamit lamang sa hustong kusog para makab-ot ang usa ka partikular nga tinguhang militar nga dili magresulta og grabeng kadaut sa armadong kasangka ug dili sukwahi sa kung unsa lamang ang matarong ug makitawhanon.

Gipahimuslan sa AFP ang superyoridad niini sa kahanginan sa pagpanghulog og bomba batok sa BHB nga walay katakus nga magdepensa ug walay puruhan nga makasukol. Dili gyera ang maong pamaagi sa dinaghang pagpukan, kundili brutal ug madugoong pagpatay. Ginaingon sa prinsipyo sa pagkadungganon nga ang katungod nga pukanon ang kaaway makatarunganon lamang kung kini anaa sa banatan. Sa pagpanghulog og bomba pipila ka kilometro gikan sa kahanginan, ginapakita sa AFP ang kawalay dungog ug katalawan.

Bisan og nagagamit na og mga drone, mas sagad pa gihapong makatunong ang mga bomba sa AFP ug makaigo, nagadaut ug nagasabwag og hilo sa mga umahan sa kapatagan nga duul sa mga komunidad, sa mga umahan sa kabukiran, sa mga lugar sa pangayam, ug mga tinubdan sa tubig, pagkaon, tambal ug uban pang rekursong gipanginabuhian sa masa. Kanhi lang, nagresulta sa pagkasunog sa dakung bahin sa kabukiran ang grabeng pagpamomba.

Adunay mga higayon nga nanghulog og bomba ug nangistraping ang AFP duul sa mga komunidad nga walay tinong target. Gibutang niini sa peligro ang kinabuhi sa mga sibilyan ug nagsabwag og grabeng kahadlok. Subli-subli ang mga kaso nga napugos ang mga tawo nga magbakwit. Aduna nay pipila ka kaso sa mga sibilyan ang namatay bisan og wala direktang naigo tungod sa kalisang nga gibunga sa pagpamomba. Ang makabungol nga hagonghong sa dinugay nga pag-alirong sa mga drone sa ilang mga komunidad ug kabukiran mitugaw sa kahilum ug nagbunga og grabeng kakulba sa masa. Namomba ang AFP aron hadlukon ang masa ug paluhuron sila sa gahum sa militar. Kini walay laing tumong kundili terorismo gikan sa kahanginan.

Binilyong piso ang giusik-usikan sa AFP sa halos adlaw-adlaw nga pagpapalupad og mga drone, helikopter ug eroplanong iggugubat. Pipila ka bilyong pisong balor sa mga bomba, rocket ug mga bala ang ginausik-usikan sa maong mga armas sa terorismo. Ginasayang ang ingon niini kadakung pondo samtang walay trabaho, ubos ang sweldo ug kita ug padayon nga pagsaka sa presyo sa mga palaliton.

Kinahanglang magkahiusa ang katawhang Pilipino batok sa brutal ug teroristang pagpamomba gikan sa kahanginan sa AFP. Kinahanglang mobarug ang mga tigpanalipud sa tawhanong katungod ug kalinaw, mga abugado ug ekspertong ligal, ug tanang nagmahal sa demokrasya, aron iasdang ang mga lakang aron ibutyag, batikuson ug iduso ang pagbawal sa paggamit sa mga armas sa terorismo sa estado. Kinahanglang ibutyag sa internasyunal nga komunidad ang kahiwian sa teroristang pagpamomba sa Pilipinas ug makighiusa sa lain pang katawhang nahiagum sa grabeng kabangis sama sa Palestine, Yemen, Syria, Kurdistan, Afghanistan, Pakistan ug uban pang nasud. Ibutyag ug makmakon ang pagsuporta sa imperyalismong US sa teroristang pagpamomba sa pasistang rehimeng Duterte.

Kinahanglang padayon nga magpakahanas ang BHB sa gerilyang pakiggubat aron pakyason ang teroristang pagpamomba sa AFP. Tanang yunit sa BHB, gamay o daku, kinahanglang hugot huptan ang mga gitibuok nga mga palisiya sa seguridad. Kinahanglang magpakamaayo ug magmamugnaon sa sekreto nga paglihok aron ipabiling buta ug bungol ang kaaway ug hikawan ang mga drone ug uban pang himan sa kaaway sa pagpaniktik.

Kinahanglang ipabilin sa tanang yunit sa BHB ang taas nga ang-ang sa pagkamalihukon ug kapasidad sa paspas nga pagbalhin-balhin aron malikayang matumbok ug mapunting sa kaaway. Kinahanglang subsub nga palaparon sa tanang yunit sa BHB ang ginalihukan niining erya. Likayan ang labing pagkakampante o pagluag nga nagatumaw sa panahon nga adunay naangkong kalampusan sa gimbuhatong militar man o sa gimbuhatong masa.

Kinahanglang padayon nga ipataas sa BHB ang kapasidad nga maglunsad og mga opensiba batok sa mga kahimanang pangkahanginan sa kaaway. Bisan wala kitay mga himang anti-aircraft, mamahimong gamiton sa mga isnayper nga Pulang mangugubat ang mga riple batok sa mga helikopter sa kaaway kung ubos ang lupad o kaha nagatugpa sa mga bukid ug sulod sa mga sonang gerilya.

Tungod sa nagkadakung papel sa mga himang pangkahanginan sa mga operasyong kontra-gerilya, sa dili magdugay mamahimong magsalig dinhi ang mga tropang pangkati sa kaaway. Atubangan niini, kinahanglang labaw pang magpakahanas ang BHB sa paggamit sa bentahe niini sa kayutaan ug suportang masa aron targeton sa mga taktikal nga opensiba ang huyang ug nabulag nga yunit sa kaaway.

Giya ang prinsipyong gisulti ni Mao: “ang mga katawhan, dili ang mga butang, ang mahukmanon,” kinahanglang pakusgon sa tanang Pulang mangugubat ang ilang kaisog, determinasyon, kaandamon sa sakripisyo ug kahibalo sa padayon nga pag-asdang sa gubat sa katawhan. Ipataas ang pulitikanhon ug pang-ideolohiyang kalig-on sa tanang yunit sa BHB samtang ginapaasdang ang malungtarong gubat sa katawhan aron makab-ot sa katawhang Pilipino ang nasudnong kagawasan ug demokrasya.