Indi malubad sang “pederasyon sang mga people’s organization (organisasyon sang pumuluyo)” sang militar ang madugay na nga problema sang mga mangunguma kag Lumad. Ini ang sabat sang Pambansang Katipunan ng mga Magbubukid-Southern Mindanao Region (PKM-SMR) sa ginbalita sang ikatlo nga semana sang Oktubre nga nagtukod ang 10th ID sang kuno pederasyon sang mga organisasyong masa sa rehiyon.
Suno sa tagapamaba sang PKM-SMR nga si Restituto Baguer, wala ginalubad sang mga organisasyon nga gintukod sang militar ang kawad-on sang duta kag iban pang porma sang pagpamigos sa mga mangunguma kag Lumad. Sa kamatuoran, siling niya, “ginapalala ang mga ini sang polisiya sang gubyernong Duterte pabor sa pagkambyo-gamit sang duta para sa kapitalista nga mga plantasyon nga monocrop (nagatanom lang sang isa ka tipo sang pananom), malaparan nga operasyon sa pagmina, agroturismo kag mga proyekto nga imprastruktura.”
Gintumod ni Baguer ang indi magnubo sa 18 banwa kag syudad sa rehiyon kon sa diin linibo ka pamilya nga mangunguma ang ginpalayas para hatagan-dalan ang pagpalapad sang mga plantasyon. Sa mga lugar nga ini, nagaserbi nga kasangkapan ang gintukod nga mga organisasyon sang militar para mapadasig ang pagpang-agaw sa mga ulumhan sang palay, mais, utanon kag iban pang pananom.
Ginhalimbawa ni Baguer ang daan nga mga organisasyon sang mangunguma kag unyon sang mga mamumugon sa Maragusan, Davao de Oro, nga nawad-an sang gahum pagkatapos sila pilit nga ginpasurender bilang mga myembro sang Bagong Hukbong Bayan (BHB). Bangud diri nakapagusto ang mga kapitalistang plantasyon sa pagpang-agaw sang duta sa tabon sang mapiguson nga agricultural ventures agreement. Suno pa kay Baguer, mas pabor sa mga kumpanya nga mag-angkon na lang sang mga ulumhan sangsa maggasto sa rehabilitasyon sang duta nga ginsamad na sang dinekada nga monocrop nga pagpananum sang mga plantasyon.
May ara man nga indi magnubo sa 37,000 ektarya nga aprubado nga sudlon sang mga kumpanya sa pagmina. Maluwas diri may isa ka milyong ektarya pa ang ginpaidalom na sa mga aplikasyon sa pagmina halin 2017. “Nagarantiya na sa mga kumpanya sa pagmina kag agroturismo ang banwa sang Talaingod kag ang kabukiran sang Pantaron, gani wala sang untat ang gera sang Armed Forces of the Philippines (AFP) batuk sa mga Lumad sa lugar,” siling ni Baguer. “Nangin taga-aprubar lang ang gintukod nga mga organisasyon sang AFP para sa pagpasilabot sang mga mapanamad nga proyekto nga ini,” dugang niya.
Gin-athag sang PKM nga wala sang programa ang mga organisasyon nga ini para bungkagon ang gahum sang agalon nga mayduta, sa libre nga pagpanagtag sang duta, o paghatag sang kumprehensibo nga ayuda para mapauswag ang produksyon. “Wala sang kampanya para pataason ang presyo sang amon mga produkto, kag panubuon ang mga balayran sa pagbulad kag pagpagaling sang ani. Wala sang pagdumili sa usura,” saysay pa ni Baguer.
Sa katapusan, ginhayag ni Baguer nga ang mga organisasyon nga nasambit kag ila mga aktibidad nga ginapangunahan sang 10th ID nagaserbi lang nga dekorasyon para ipakita nga nagmadinalag-on ang ila kampanya kontra-insurhensya. “Mas malala, ang mga ini ginahimo nga bulugasan sang militar,” dugang niya.
Sa Southern Leyte nagpanguna man sang 8th ID sa pagtukod sang “pederasyon” sa pareho nga katuyuan.
Indi na bag-o ang pagtukod sang AFP sang mga organisasyon nga pangtumbas kuno sa mga organisasyong masa sa mga baryo kag komunidad. Sa idalom sang Oplan Bayanihan sang rehimeng US-Aquino III, ang mga “peace and development team” nga nag-okupar sa mga komunidad pilit nga nagtukod sang mga “counter-organization” sang mga mangunguma, pamatan-on kag kababainhan. Lunsay napaslawan ang mga ini nga waskon ang paghiliusa sang mga residente sa baryo. Nagapabilin gihapon nga nakatindog sa mga baryo ang PKM.
Ang PKM ang rebolusyonaryong organisasyon sang mga mangunguma nga hugot nga katuwang sang BHB sa pagpasulong sang rebolusyong agraryo.
PRWC Newsroom » Ang Bayan 