Hugot nga ginakundena sa Partido Komunista ng Pilipinas (PKP) ang Armed Forces of the Philippines (AFP), partikular ang 4th ID, sa walay dungog nga binuhatan sa pagpatay kang Ka Oris (Jorge Madlos) ug sa kauban niyang medik nga si Ka Pika. Ginakundena usab niini ang misunod nga engrandeng pasundayag sa midya ug mga bakak sa mga dagkung upisyal militar para tabunan ang ilang krimen.
Si Ka Oris, 72, gituboy nga myembro sa Komite Sentral, Kawanihan sa Pulitika ug Komiteng Tigpatuman sa PKP. aduna siyay taas nga katungdanan ug nahimong tigpamaba sa National Operational Command (NOC) sa Bagong Hukbong Bayan (BHB). Usa siya sa mga unang kadre sa partido nga nagtukod sa BHB sa Mindanao. Isip parangal, gideklara sa PKP isip Pangkalibutang Adlaw sa Paghandum alang kang Ka Oris ang Nobyembre 7. (Para sa tibuok parangal sa PKP, basaha ang espesyal nga isyu sa Ang Bayan, Nobyembre 2, 2021.)
Sukwahi sa ginapakaylap sa militar, wala namatay sa engkwentro sila Ka Oris ug Ka Pika. Nagsakay sila og habalhabal ug nagbyahe gikan sa sentro sa lungsod sa Impasug-ong Bukidnon padulong sa nasudnong haywey sa dihang giambus sila sa mga sundalo sa 403rd IBde. Nagbyahe sila niadtong panahona para sa regular nga tsek-ap sa panglawas ug pagpatambal. Pareho silang dili armado ug walay katakus nga mosukol.
Upat ka oras human ang pagpatay, gialurangan sa mga FA-50 fighter jet ug mga helikopter ang Sityo Gabunan, Barangay Dumalaguing, sa parehong lungsod. Pagkaugma, Oktubre 30, giutingkay kuno sa mga yunit sa militar ang gibombahang dapit. Sa di katoohang istorya, gipagawas sa AFP nga “nakaengkwentro” bandang alas-11 sa buntag sa militar ang yunit sa BHB nga nahisakupan ni Ka Oris ug Ka Pika. Didto kuno nila “nakuha” ang patayng lawas sa duha.
Dili makapagawas ug bisan unsang litrato sa nahitaboan sa engkwentro ang AFP. Tanan nga mga litrato sa lawas ni Ka Oris pinadul-it nga gikuha. Sa mga litrato, nakaahit ang bungot ug taas nga bangas ni Ka Oris, butang nga ginabuhat lamang niya kun mubiyahe siya ug kinahanglan bag-ohon ang iyang dagway.
Aron ipugos ang bakak nga “engkwentro,” balik-balik pang gibomba sa AFP ang bukirong bahin sa Dumalaguing niadtong Nobyembre 2.
Nagmugna pa og istorya ang militar nga kanunay kuno naga-adto si Ka Oris sa Cagayan de Oro para magpa-dialysis. Walay sakit sa kidney si Ka Oris. Ang iyang balatian resulta sa pagdaut sa iyang pantog, nga labaw sa tulo ka dekada na niyang ginaantos.
Niadtong Nobyembre 3, gisunog sa AFP ang ebidensya sa ilang krimen sa unilateral nga desisyong ipa-cremate (pagsunog aron buhatong abo) ang mga patayng lawas nila Ka Oris ug Ka Pika. Pagsubay kuno kini sa mga protokol sa Covid-19 tungod kay matud niini, nagpositibo ang ilang lawas sa bayrus (butang nga wala usay laing makapamatuod). Gibuhat kini sa AFP bisan padulong na kaniadto ang igsuon ni Ka Oris para kuhaon ang iyang lawas.
Gihikaw sa AFP ang tanang posibilad para ipa-awtopsiya ang patayng lawas sa independyenteng mga duktor. Sukwahi usab kini sa gihangyo sa iyang mga pamilya ug sa rebolusyonaryong kalihukan nga ibalik ang iyang lawas sa Siargao Island sa Surigao del Norte para makita sa katapusang higayon sa iyang pamilya. Nailo ni Ka Oris ang iyang asawa nga si Maria Malaya, ug ilang duha ka anak.
PRWC Newsroom » Ang Bayan 