Walay kahimutangan ang kalisang sa mga lumulupyo sa Sityo Damugnay, Los Angeles, Butuan City niadtong Nobyembre 3 tungod sa walay-puas nga pagpamomba sa mga helikopter sa Armed Forces of the Philippines (AFP) sa ilang lugar.
Sa usa ka bidyo nga kuha sa usa lumulupyo, mabatian ang kahadlok ug kalisang sa mga tawo. Madungog ang kusog nga pagbusikad ug sunud-sunod nga buto, lakip ang mga singgit ug iyagak. Sa ulahing bahin sa bidyo makitang mibiya sa ilang mga balay mga tawo.
Gikumpirma sa pamahayag ni Ka Diwa Habagat sa Bagong Hukbong Bayan (BHB)-Agusan del Norte ang nasinati sa mga lumulupyo. Siya nagkanayon nga ala 1:45 sa maong kahaponon, dili moubos sa upat ka dagkung bomba ang gihulog sa mga helikopter nga Black Hawk, ug gatusan nga mga bala sa kalibre .50 nga masinggan ang gipaulan sa mga umahan ug bukid.
Ang insidente sa Butuan City lakip sa tulo ka natahong pagpamomba sa Mindanao sulod lamang sa lima ka adlaw. Niadtong Oktubre 30, gibomba ug giistraping ang Sityo Gabunan, Barangay Dumalaguing, Impasug-ong, Bukidnon gikan alas 12:40 sa tungang gabii hangtud pasado alas-2 sa kaadlawon. Sa maong panahona, dili moubos sa unum ka dagkung bomba ug dose-dosenang rocket ang gipaulan sa AFP sa lugar.
Subling gibomba ang parehong barangay niadtong Nobyembre 2, alas-9 sa gabii. Katugbang sa dili moubos sa tulo ka toneladang bomba ang gihulog sa upat ka eroplanong OV-10. Lakip dinhi ang tag-upat nga bombang adunay gibug-atong 250 libra ug 500 libra. Tungod sa sobra-sobra nga bomba, sunud-sunod nga gitay-oy ang yuta ug nasunog ang dakung bahin sa kabukiran. Hugot kining gikundena bisan sa mga syentista nga nagsulting ang pagsunog sa lapad nga kalasangan dugang sa pag-init sa kawangangan.
Sulod sa 12 ka semana gikan sa tungatunga sa Agosto hangtud unang semana sa Nobyembre adunay natahong unum ka ka susamang pagpamomba. Katugbang kini sa usa ka serye sa pagpamomba matag duha ka semana. Duha sa mga insidente ang sa Eastern Visayas ug usa sa Cagayan Valley.
Dili moubos sa duha ka sibilyan ang nataho nga namatay tungod sa mga pagpamomba, ug pipila ang nasamdan. Si Ruben Darasin, mag-uumang taga-Barangay Balang-balang sa Remedios T. Romualdez, ang namatay humang midagan padulong sa suba tungod sa pagkataranta dihang gibombahan ang bukirong bahin sa Sityo Damugnay. Mga samad ug pangus sa kalawas usab ang nahiagum sa mga nag-uma tungod sa paglikay sa peligrong maigo sa pagpamomba.
Sa Bobon, Northern Samar niadtong Setyembre 16, tungod usab sa kahadlok bunga sa pagpanganyon ug pagpamomba nakuhaan ang usa ka mabdos ug namatay. Duha ka bala sa 105mm nga kanyon ug dili moubos sa 11 ka rocket ang gipaulan sa militar sa lugar gikan alas-3 sa kaadlawon hangtud alas-10 sa buntag.
Lima ka mag-uuma usab ang biktima sa pagpang-istraping sa 20th IB ug mga pulis sa magkabulag nga insidente sa Barangay Epaw, Las Navas niadtong Oktubre 14 ug Barangay San Vicente, Catubig sa Samar sa misunod nga adlaw. Duha sa mga biktima ang nasamdan ug usa ang iligal nga gidakop.
Gatusan usab ang hilabihang nahadlok tungod sa mga pagbusikad. Sa insidente sa Butuan City, bisan ang mga lumulupyo sa upat nga kasikbit nga barangay nabalakang madamay sa pagpamomba. Sa laing bidyo sa pagpamomba sa Dumalaguing, nagpadayag usab ang mga lumulupyo sa ilang kahadlok nga mabutang sa peligro ang kinabuhi sa ilang mga kapamilya.
Tungod sa teroristang epekto sa pagpamomba gikan sa ere, suportado kini sa mga bakak nga pugos nga ginapadawat sa publiko. Asintadong operasyon kuno ang paghulog og mga bombang adunay gibug-atong 500 libra (katugbang sa halos 230 kilos) bisan giguba niini ang langkob sa 90-183 metro palibot, ug mas lapad pa kung sukdon ang naabot sa mga shrapnels sa bomba.
Niadtong Nobyembre 5, gibalita ang pag-abot sa Mindanao sa unum ka dugang Black Hawk nga helikopter, nga labawng magsabwag og teror sa mga komunidad ug bukid. Apan matud sa BHB-Agusan del Sur, kinahanglan ang pagbutyag sa tagabaryo sa maong mga kabangis hinayhinay nga matransporma ang kahadlok ngadto sa kolektibong kaisog.
PRWC Newsroom » Ang Bayan 