Awan pakailaunan ti buteng dagiti residente iti Sityo Damugnay, Los Angeles, Butuan City idi Nobyembre 3 gapu iti nadangkok a panagbomba dagiti helikopter ti Armed Forces of the Philippines (AFP) iti lugar da.
Iti maysa a bidyo nga innala ti maysa a residente, mailasin ti buteng ken pannakataranta dagiti residente. Mangngeg ti napipigsa a panagbettak ken agsasaruno a ranipak, kasilpo dagiti ikkis ken sangsangit. Iti maudi a paset ti bidyo ket makita nga agpapanaw dagiti bumaryo.
Pinaneknekan ti pablaak ni Ka Diwa Habagat ti Bagong Hukbong Bayan (BHB) – Agusan del Norte ti pinagteng dagiti residente. Kuna na nga ala 1:45 ti didiay nga aldaw, saan a bumaba iti uppat a dadakkel a bomba ti intennag dagiti helikopter a Black Hawk, ken ginasut a bala ti kalibre .50 a masinggan ti pinatudo da kadagiti taltalon.
Ti insidente iti Butuan City ket kabilang iti tallo a nailista a panagbomba iti Mindanao iti uneg ti lima nga aldaw. Idi Oktubre 30, nabomba ken naistraping ti Sityo Gabunan, Barangay Dumalaguing, Impasug-ong, Bukidnon manipud 12:40 ti agsapa agingga pasado alas-dos ti bigat. Daytoy a panawen, saan a bumaba iti innem a dadakkel a bomba ken dose-dosena a rocket ti inpatudo ti AFP iti lugar.
Balbaliw a nabomba ti kapada a barangay idi Nobyembre 2, alas-9 ti rabii. Kas kadagsen ti saan a bumaba iti tallo a tonelada a bomba ti intenng ti uppat nga eroplano nga OV-10. Kabilang ditoy ti sag-uuppat a bomba nga agdagsen ti 250 libra ken 500 libra. Gapu iti aglablabes a pasabog, agsasaruno a nagungon ti daga ken napuoran ti dakkel a paset ti kabanbantayan. Nainget a kinundenar daytoy uray dagiti syentista a nagkuna a ti panagpuor ti nalalawa a kabakiran ket mangnaynayon iti panagpudot ti atmospera.
Iti uneg ti 12 lawas manipud katengngaan ti Agosto agingga umuna a lawas ti Nobyembre ket adda ti nailista nga innem a kapada a panagbomba. Katukad daytoy ti maysa a serye ti panagbomba tunggal dua a lawas. Dua kadagiti insidente ket iti Eastern Visayas ken maysa iti Cagayan Valley.
Saan a bumaba iti dua a sibilyan ti naiyulat a pimmusay gapu kadagiti panagbomba, ken sumagmamano ti nasugatan. Ni Ruben Darasin, mannalon a taga-Barangay Balang-balang iti Remedios T. Romuldez, ket natay kalpasan a nagtaray idiay karayan gapu iti pannakataranta idi mabomba ti Sityo Damugnay. Dunor ken gasgas met iti bagi ti nalak-am dagiti agtrabtrabaho iti kataltalonan gapu iti panaglibas manipud iti peggad a mapuntaan da iti panagbomba.
Iti Bobon, Northern Samar idi Setyembre 16, gapu met iti buteng nga ipapaay ti panagkanyon ken panagbomba ket naregregan ti maysa a masikog ken natay. Dua a bala ti 105mm a kanyon ken saan a bumaba iti 11 rocket ti inpatudo ti militar iti lugar manipud alas-3 ti parbangon agingga alas-10 ti bigat.
Lima met a mannalon ti biktima ti panagis-istraping ti 20th IB ken dagiti pulis iti agsina nga insidente iti Barangay Epaw, Las Navas idi Oktubre 14 ken barangay San Vicente, Catubig iti Samar iti sumaruno nga aldaw. Dua kadagiti biktima ti nasugatan ken maysa ti iligal a nakemmeg.
Ginasut met ti sinaklot ti buteng gapu kadagiti panagbettak. Iti insidente iti Butuan City, uray dagiti residente iti uppat a kabangibang a barangay ket nagdanag a mairaman iti panagbomba. Iti agsisina a bidyo iti panagbomba iti Dumalaguing ket nagiyebkas met dagiti residente ti panagdanag a maipeggad ti biag dagiti kapamilya da.
Ti terorista nga epekto ti panagbomba manipud iti ere ket suportado dagiti inuulbod a pilit a maipapaaklon iti publiko. Presiso nga operasyon kano ti panagitennag kadagiti bomba nga agdagsen ti 500 libra (kabatog ti 230 kilo) idinto a daddadaelen daytoy ti adda iti sakupen ti 90-183 metro nga aglikmot, ken nalawlawa pay nu rukoden ti madandanun ti napirgi-pirgis a bomba.
Idi Nobyembre 5, naipadamag ti panagsangpet iti Mindanao ti innem a nayon a Black Hawk nga helikopter, nga ad-adda a mangimula iti teror kadagiti komunidad ken taltalon. Ngem basar iti BHB-Agusan del Sur, kasapulan nga ibunannag ti bumaryo dagidiay nga aliaw tapno inot-inot a maitransporma ti buteng iti kolektibo a tured.
PRWC Newsroom » Ang Bayan 