Ang pagpanghulog sang mga bomba halin sa kahanginan sang mga eroplano panggera kag helikopter kag ang katuwang nga paggamit sang mga drone para sa sarbeylans sa ginahimo nga gera kontra-gerilya lapas sa internasyunal nga makatawong layi nga nagaubay sa kondukta sang gera. Ang paggamit sang mga armas nga ini dapat untaton kag dumilian.
Sobra-sobra ang ginahulog nga mga tonelada nga bomba, ginapalupad nga rocket, ginabuga nga mga bala sang masinggan, kag pagpanganyon sang militar. Ang mga mabaskog nga armas, nga kinaandan ginagamit pangwasak sa mga tangke kag bilding, nagadulot sang daku nga mga halit sa kabuhi kag kapalibutan. Labing makangilil-ad ang paggamit sang Armed Forces of the Philippines (AFP) sang “proximity fuse” para palukpon ang bomba pila ka metro antes ini magtupa sa duta nga nagatuga sang mas malapad nga halit.
Ginapataas sang AFP ang ikasarang sini sa pag-asinta sang pagbomba paagi sa paggamit sang mga drone para sa pang-ere nga sarbeylans (pagkuha sang litrato, thermal imaging kag elektronikong paniktik) sa malapad nga kalupaan. Nagasugpon ini sa lokal nga mga espiya kag mga kagamitan paniktik para tumuron ang mga pwesto sang Bagong Hukbong Bayan (BHB).
May pila na ka kahigayunan nga nag-igo ang mga bomba sa mga pwesto o kampo sang BHB nga ginkamatay sang madamo nga numero sang Pulang hangaway, pareho sang pag-utas sa kabuhi sang 20 sa Dolores, Eastern Samar sang Agosto 16, 10 sa Gingoog City sa Misamis Oriental sang Mayo 10, 2020, kag pito sa Sta. Teresita, Cagayan Valley sining Septyembre 21. Masami ginahimo ang pagpamomba sa mga natumod nga pwesto sang BHB sa kaagahon antes magsanag.
Ang paggamit sang sobra kabaskog nga mga armas liw-as sa mga prinsipyo sang makatawong layi nga nagasaad sa paggamit lang sang tama nga kusog para maagum ang isa ka partikular nga tuyo militar nga wala nagadulot sang sobra-sobra nga halit sa armadong pangontra kag indi liw-as sa kon ano lang ang tama kag makatawo.
Ginahingalitan sang AFP ang bentaha sini pangkahanginan batuk sa BHB sa paghulog sang bomba sa mga armadong pangontra nga wala sang ikasarang magdepensa kag wala sang kahigayunn nga makabato. Indi gera ang amo nga paagi sang madamuan nga pagpatay, kundi brutal kag maduguon nga pagpamatay. Ginasaad sang prinsipyo sa kinamatarung nga patyon ang kaaway matarung lang kon ini ara sa patag-awayan sang armadong inaway. Sa paghulog sang bomba halin sa pila ka kilometro sa ere, ginapakita sang AFP ang wala sang dungog kag tuman nga katalaw.
Sa pihak sang paggamit sang mga drone, mas masami nga nagapaltos gihapon ang mga bomba sang AFP kag nagaigo, nagahalit kag nagasabwag sang hilo sa mga uma sa kapatagan nga malapit sa komunidad, sa mga talamnan sa bukid, sa mga lugar nga pangayaman kag mga ginakuhaan sang tubig, pagkaon, bulong kag iban pang resorsa sa pangabuhian sang masa. Sini lang, nagresulta sa pagkasunog sang daku nga bahin sang kabukiran ang grabe nga pagpamomba.
May mga kahigayunan nga nagahulog sang bomba kag naga-istraping malapit sa mga komunidad nga wala sang maathag nga target ang AFP. Ginabutang sini sa peligro ang kabuhi sang mga sibilyan kag nagasabwag sang grabeng kakugmat. Paliwat-liwat ang mga kaso nga napwersa nga magbakwit ang mga tawo. May pila ka kaso sang mga sibilyan nga wala man direktang naigo napatay bangud sa aksidente nga dulot sang pagpamomba. Ang makatilingil nga hugong sang malawigan nga pagtiyog-tiyog sang mga drone sa ila mga komunidad kag kabukiran nagasamad sa kalinungan kag nagadulot sang labaw nga kakugmat sa masa. Nangbomba ang AFP agud kugmaton ang masa kag paludhon sila sa gahum sang militar. Ano pa bala ini kundi terorismo halin sa kahanginan?
Binilyon nga piso ang ginapatuyangan sang AFP sa halos adlaw-adlaw nga pagpalupad sang mga drone, eroplano panggera kag helikopter. Pila ka bilyong piso ang balor sang mga bomba, rocket kag mga bala ang ginausikan para sa mga armas nga ini sang terorismo. Ginausik ang amo kadaku nga pondo samtang wala sang trabaho, manubo ang sweldo kag wala sang kita kag sige-sige nga nagasaka ang presyo sang mga balaklon.
Dapat maghiliusa ang pumuluyong Pilipino batuk sa brutal kag teroristang pagpamomba halin sa ere sang AFP. Dapat manindugan ang nagasakdag sa tawhanong kinamatarung kag kalinungan, mga abugado kag ligal nga eksperto, kag tanan nga nagamahal sa demokrasya, para isulong ang mga tikang nga ibuyagyag, pakamalauton kag iduso ang pagdumili sa paggamit sang mga armas sang terorismo sang estado. Dapat ibuyagyag sa internasyunal nga komunidad ang kalainan sang teroristang pagpamomba sa Pilipinas kag makiisa sa iban pang pumuluyo nga nagaagi sang pareho nga kalakasan tulad sa Palestine, Yemen, Syria, Kurdistan, Afghanistan, Pakistan kag iban pang pungsod. Ihayag kag kundenahon ang pagsuporta sang imperyalismong US sa teroristang pagpamomba sang pasista nga rehimeng Duterte.
Dapat padayon nga magpasanyog ang BHB sa gerilya nga pagpakig-away agud paslawon ang teroristang pagpamomba sang AFP. Tanan nga mga yunit sang BHB, gamay o daku, dapat lubos nga magsunod sa mga ginhimo nga pagsulundan pangseguridad. Dapat mangin maayo kag matinugahon sa tago nga paghulag agud ipabilin nga bulag kag bungol ang kaaway kag himuon nga indi epektibo ang mga drone kag iban pang kagamitan sang kaaway sa paniktik.
Dapat ipabilin sang tanan nga yunit sang BHB ang mataas nga lebel sang mobilidad kag ikasarang sa madasig nga pagsaylu-saylo agud likawan nga makibon kag matumod sang kaaway. Kinahanglan nga sige-sige nga palaparon sang tanan nga yunit sang BHB ang ginahulagan sini nga lugar. Likawan ang sobra nga pagkumpyansa o paghalog nga nagatuhaw sa tion nga may naagum nga kadalag-an sa hilikuton militar man o sa hilikuton masa.
Dapat sige-sige nga pataason sang BHB ang ikasarang nga maglunsar sang mga opensiba batuk sa mga kagamitan pangkahanginan sang kaaway. Wala man kita sang mga kagamitan nga anti-aircraft, maggamit sang mga isnayper nga Pulang hangaway ang mga riple batuk sa mga helikopter sang kaaway kon nagalupad sang manubo o indi gani nagahugpa sa mga bukid kag sa sulod sang mga sonang gerilya.
Bangud sa nagadaku nga papel sang mga kagamitan pangkahanginan sa mga operasyong kontra-gerilya, indi magdugay nga mangin palasalig pirme diri ang mga tropang impantri sang kaaway. Sa atubang sini, dapat labi pa nga magpakasanyog ang BHB sa paggamit sang bentaha sang kadutaan kag suportang masa sini agud targeton sang mga taktikal nga opensiba ang mga maluya kag nahamulag nga yunit sang kaaway.
Sa ubay sang prinsipyo nga ginsaad ni Mao: “ang pumuluyo, indi ang mga bagay, ang desaysibo,” dapat pasanyugon sang tanan nga Pulang hangaway ang kaisog, determinasyon, kahandaan sa sakripisyo kag kinaalam sa padayon nga pagpasulong sang inaway banwa. Pataason ang pangpulitika kag pang-ideolohiya nga kalig-on sang tanan nga yunit sang BHB samtang ginasulong ang malawigan nga inaway banwa para maagum sang pumuluyong Pilipino ang pungsodnon nga kahilwayan kag demokrasya.
PRWC Newsroom » Ang Bayan 